One-Minute Hirit 8: Ang Solusyon Ni Toni G sa Pamboboykot Laban sa Kanya (No Bashing; Analysis Lang)

Naging maugong ang panawagan – lalo na mula sa mga Kakampink - - na kanselin o boykotin si Toni G. dahil di nila nagustuhan ang political choice at career move niya noong nakaraang eleksyon. Political choice niya, BBM for president. Showbiz career move, yung maging major, major entertainer sa campaign rallies ni BBM. Kaya yung mga dating fans niya raw, na mula sa burgesya na mga Kakampink, eh di inabandona’t tinatabla na siya. Pero may alas si Toni G: at ito ang pagiging makalimutin ng mga Pinoy. Hintay lang at lilipas din ito. Eh di ba alam din ni BBM iyan? Eh yung mga human rights violation noong martial law, yung pandarambong ng pamilya niya, yung crony capitalism, etcetera ay nabaon na nga sa limot, eh itong isyu pa kaya kay Toni G?

 

One-Minute Hirit 5: Si Kongresman George Santos at ang Botanteng Pilipino (Enero 8, 2023)

Si Kongresman George Santos ay kaka-sworn in lang sa kongreso ng Estados Unidos. Bale Amerikano siya at hindi Pilipino kaya hindi naman siya pwedeng tumakbo sa kahit anong politikal na posisyon dito. Pero mapupulutan ng aral ang kasalukuyang sitwasyon niya. Kakaupo pa lang pero pinagreresign na ng kanyang mga constituents sa 3^rd congressional district ng New York dahil sa mga nabistong kasinungalingan at iba pang mga atraso. Graduate daw siya ng Baruch College, eh hindi naman. Mga Hudyo raw ang kanyang mga magulang, eh hindi rin naman pala. At may mga kaso pa sa pera tulad ng pagnanakaw, pag-iwas sa pagbayad ng utang, at iba pa. Pero sakaling Pilipino siya at tatakbo dito sa atin, manalo kaya? Makaupo kaya sa Malacanang sa 2028?

+ + +

One-minute hirit lang po dahil tayo’y mga busy, pero kailangan pa ring mag-isip-isip at magtanong-tanong ukol sa sámot-sarìng isyu ng ating lipunan! At least one video per week sa bagong serye na ito, sa mga relevant na paksa. Salamat!